ԱՄԲ-ի նախապատրաստումը նույնքան կարևոր է, որքան  բուժումը: Այն օգնում է գնահատել հաջողության հնարավորությունները, նվազեցնել ռիսկերը և շտկել հայտնաբերված խանգարումները մինչև բուժումը սկսելը։

Ձվարանային ռեզերվի գնահատում
Ձվարանների խթանմանն արձագանքը կանխատեսելու համար անհրաժեշտ է գնահատել ձվարանային ռեզերվը: Դրա համար օգտագործվում են՝

• արյան անալիզ՝ Ֆոլիկուլախթանիչ հորմոնի(ՖԽՀ) մակարդակի համար մենստրուալ ցիկլի սկզբում,
• անտրալ ֆոլիկուլների հաշվարկ ուլտրաձայնային հետազոտությամբ,
• անտիմյուլլերյան հորմոնի (AMH) մակարդակի գնահատում

Եթե ՖԽՀ-ի մակարդակը բարձր է, իսկ AMH-ը՝ ցածր, հնարավոր է, որ ձվարանային ռեզերվը ցածր է, ինչը կարող է նվազեցնել հաջող բեղմնավորման հավանականությունը։

Արգանդի և արգանդափողերի հետազոտություն
ԱՄԲ-ն սկսելուց առաջ անհրաժեշտ է բացառել արգանդի պաթոլոգիաները՝

• պոլիպներ,
• սինեխիաներ (կպումներ),
• միոմաներ, որոնք կարող են խանգարել սաղմի իմպլանտացիային։

Այսպիսի խնդիրները պահանջում են վիրահատական միջամտություն։
Հիդրոսալպինքսը  (հեղուկի կուտակում արգանդափողում)
Կարող է բացասաբար ազդել սաղմի վրա և նվազեցնել հղիության հավանականությունը, ուստի նման դեպքերում անհրաժեշտ է վիրահատական հեռացում կամ փողի կապում։
 
Սերմնահեղուկի հետազոտություն
Տղամարդուն անհրաժեշտ է անցնել սպերմոգրամայի անալիզ։ Եթե հայտնաբերվում են խախտումներ, անհրաժեշտ է անդրոլոգի խորհրդատվություն։ Մասնագետը կորոշի՝ կարելի՞ է բարելավել որակը և արդյոք գոյություն ունեն թաքնված պատճառներ, այդ թվում՝ գենետիկական։

Օրինակ՝

• Y քրոմոսոմի դելեցիան կապված է ազոոսպերմիայի հետ,
• Սերմնատար խողովակների բացակայությամբ տղամարդիկ կարող են լինել մուկովիսցիդոզի մուտացիայի կրողներ։

Այս դեպքերում խորհուրդ է տրվում զույգի գենետիկական թեստավորում։

Պարտադիր անալիզներ
Երկու զուգընկերն էլ անցնում են վարակների հետազոտություն՝

• ՄԻԱՎ, սիֆիլիս, հեպատիտ B և C,
• բակտերիալ ֆլորայի և սեռավարակների համար անալիզ,
• անհրաժեշտության դեպքում՝ հորմոնային պրոֆիլ։

Լիարժեք հետազոտությունն օգնում է շտկել իրավիճակը մինչև խթանման փուլը։

Ինչն է բարձրացնում ԱՄԲ-ի հաջողության հնարավորությունը
Շատ բուժառուներ հարցնում են՝ ի՞նչ կարող ենք անել հաջողության հավանականությունը բարձրացնելու համար: Ահա հիմնական առաջարկները՝

1․ Ծխելուց հրաժարում
Նիկոտինը վատթարացնում է ձվաբջիջների և սերմնաբջիջների որակը։ Ծխելու հետևանքներն են՝

• ԱՄԲ-ի հաջողության հավանականության նվազեցում 50-70%-ով,
• հղիության կորուստի վտանգի մեծացում,
• ձվարանների խթանման վատ արձագանք։

Հետևաբար, ծխելուց ամբողջական հրաժարումը 3 ամիս առաջ բուժման մեկնարկից՝ պարտադիր պայման է։

2․ Թմրանյութերի և ոչ ցանկալի դեղամիջոցների բացառում
Թմրանյութերն ու չթույլատրված դեղամիջոցները կարող են առաջացնել անպտղություն և բացասաբար ազդել պտղի զարգացման վրա։ Բոլոր դեղամիջոցները, սննդային հավելումները և բուսական պատրաստուկները պետք է համաձայնեցվեն բժշկի հետ։

3️․ Քաշի վերահսկում Ավելորդ կամ պակաս քաշը կարող է ազդել բուժման արդյունավետության վրա։ Վերահսկվում է մարմնի զանգվածի ինդեքսը (ՄԶԻ)՝

• ԱՄԲ-ի համար օպտիմալ ՄԶԻ-ն՝ 19-ից 30 կգ/մ²,
• Եթե ցուցանիշը դուրս է այդ միջակայքից, անհրաժեշտ է նախապես կարգավորել քաշը։

4️․ Առողջ սննդակարգ և կենսակերպ

• Սննդային հավասարակշռված ռեժիմ՝ հարուստ սպիտակուցներով, վիտամիններով և միկրոէլեմենտներով,
• Կոֆեինի սահմանափակում (ոչ ավելի, քան 1-2 բաժակ օրական),
• Ալկոհոլից լիակատար հրաժարում նախապատրաստման, խթանման և վաղ հղիության ընթացքում։

5️․ Ֆոլաթթվի ընդունում
Ամեն օր ընդունեք ֆոլաթթու 400 մկգ դեղաչափով բեղմնավորումից նվազագույնը 3 ամիս առաջ և առաջին եռամսյակում՝ պտղի նյարդային համակարգի արատները նվազեցնելու համար։

6️․ Կարմրախտի դեմ պատվաստում
Եթե հակամարմիններ չկան, անհրաժեշտ է պատվաստում ԱՄԲ-ի մեկնարկից առաջ, քանի որ կարմրախտը հղիության ընթացքում կարող է առաջացնել լսողական, տեսողական կամ զարգացման խնդիրներ պտղի մոտ։

7️․ Ֆիզիկական ակտիվություն
Խթանման ընթացքում խորհուրդ չեն տրվում ինտենսիվ մարզումները, սակայն չափավոր ֆիզիկական ակտիվությունը (20-30 րոպե, շաբաթական 3-4 անգամ) օգտակար է՝

• ընդհանուր ինքնազգացողությունը բարելավելու,
• նյութափոխանակությունը կարգավորելու,
• սթրեսը նվազեցնելու համար։

8️․ Քրոնիկ հիվանդությունների վերահսկում
Եթե ունեք շաքարային դիաբետ, հիպերտոնիա, աուտոիմուն կամ այլ հիվանդություններ, անհրաժեշտ է նախապես խորհրդակցել մասնագետի հետ՝ բուժման ընթացքը ճիշտ կազմակերպելու համար։